Rayon Sports yanganyije na Al-Merrikh ibitego 2-2 mu mukino w’umunsi wa 15 wa Shampiyona wabereye kuri Kigali Pele Stadium, kuri uyu wa Gatatu, tariki ya 21 Mutarama 2026.
Muri uyu mukino, Rayon Sports yari yagaruye mu kibuga rutahizamu Fall Ngagne wari umaze iminsi 333 adakina kubera imvune.
Ku rundi ruhande, Al-Merrikh ntiyarifite Umutoza Mukuru, Darko Novic, kuko yujuje amakarita atatu y’umuhondo, umukino watojwe na Dragan Culum usanzwe ari Umutoza Wungirije.
Rayon Sports ni yo yatangiye neza umukino bidatsinze ku munota wa 8, yafunguye azamu ku gitego cyatsinzwe na Tambwe Gloire ku mupira wahinduwe mu izamu na Ben Aziz Dao.
Iyi kipe yakomeje gusatira harimo umupira Yannick Bangala yacomekeye umupira Fall Ngagne, ashatse kuroba umunyezamu wa Al-Merrikh, asanga ari maso ahita awufata neza.
Mu minota 25, umukino wagabanyije umuvuduko, amakipe yombi akinira cyane mu kibuga hagati bituma amakosa kwiyongera.
Ku munota wa 33’ Rayon Sports yatsinze igitego cya kabiri cyinjijwe na Kitoko Likau Faustin ku mupira yatereye mu rubuga rw’amahina kuburagare bw’ubwugarizi bwa Al-Merrikh.
Igice cya mbere cyarangiye Rayon Sports yatsinze Al-Merrikh ibitego 2-0.
Al-Merrikh yatangiranye impinduka mu igice cya kabiri, Faisal Ishag asimburwa na Yagoub Badawi.
Muri iki gice, iyi kipe yagarukanye imbaraga nyinshi bidatsinze ku munota 48, yabonye igitego cya mbere cyo kwishyura cyinjijwe na Bachir Bangoura nyuma yo gusiga abakinnyi b’inyuma ba Rayon sports ahita aroba umunyezamu Mugisha Yves wari wasohotse umupira uruhukira mu izamu.
Al- Merrikh yakomeje kwiharira cyane umupira hagati mu kibuga harimo umupira watewe Obino Chisala ufatwa neza n’umunyezamu Mugisha Yves.
ku munota wa 88, Moise Camara yishyuriye Al-Merrikh igitego cya kabiri ku mupira ubanje gukorwaho na Ishag Faisal atera ishoti ujya mu izamu.
Umukino warangiye amakipe yombi anganyije ibitego 2-2, Rayon Sports yuzuza imikino itatu yikurikiranya idatsinda.
Al- Merrikh yagumye ku mwanya wa Kane n’amanota 32 mu gihe Rayon Sports ikomeje kujya ahabi yagumye ku mwanya wa Cyenda n’amanota 25.
Rayon Sports izasubira mu kibuga ku wa Gatandatu, tariki ya 24 Mutarama 2026, yakirwa na Mukura VS mu mukino usoza ibanza ya Shampiyona, uzabera Kuri Stade ya Muhanga.
